يؤلمني..

يؤلمني ابتعاد من تربطني بهم صلة الرحم..

يؤلمني أن يغيّبكِ الموت يا جدتي..

يؤلمني الجحود و نكران الجميل..

يؤلمني التفكير فيما قد يخبئه الزمان لي من احزان..

يؤلمني ان ارى المسلم يكفر اخاه المسلم و يستهزأ به..

يؤلمني وجود من يتصفون بالقسوة و الأنانية ..

يؤلمني قتل الأبرياء في أي بقعة على سطح الأرض..

تؤلمني رؤية مشاهد الأطفال القتلى و أشلاءهم الممزقة في غزة..

سوالف

ترى هذا البوست خلطبيطة سوري مقدما اذا احد افتر راسه او شي بعد قراءة البوست
:)
تصيرلي مرات مواقف غريبة استغرب عليها يعني امس تذكرت وحدة تصير حق يدتي الله يرحمها عاد تذكرتها طرت على بالي بعدها بساعتين جان امي تييني تقول لي لحقي عرفتي فلانة؟ (اللي كنت افكر فيها) ابوها يايته جلطة و اهوا بالسيارة في لبنان و متوفي
انا :@@
جد جد اخترعت شلون اطريها في بالي و عقبها اسمع خبر جذي ضايقني حيل الخبر الله يرحم أبوها و يغمد روحه الجنة و يصبرها اهيا و كل اهله قولوا آمين عاد حدهم محترقين عليه :(

اليوم كليت اكلة لذيييييييييذة لذة مو طبيعية،احس الأكل اللذيذ متعة لا تضاهيها متعة،الأكلة كانت مموش ربيان مع دقوس صبار خالتي و بنت خالتي طابخينه حق الحسينية يعطيهم الف عافية وامبيه الدقوس طعمه مو طبييييييعي،عاد انا قايلتلكم قبل فيني فقر اكل لذيذ لأن طباخنا اكله مو حلو بالمرة فاليوم حده يوم تاريخي عندي قلت ضروري ادونه عشان اتذكره للأبد
D:
فيه سالفة قديمة حصلت حق واحد يصيرلي حَب بنت و ملجوا عاد في مرة فاجأها و طلب منها الموبايل رفضت تعطيه عقبها عصب و خذا منها موقف و زعل،قامت دقت عليه الظهر جان تقول له الحين تعال اخذه،قال لها عقب شنوا،انا بغيته نفس اللحظة،اهيا كانت تقول ان اهوا طلب منها الموبايل في حزة متأخرة حيل بالليل و ما تقدر تطلع له بالسكة تعطيه الموبايل في هذي الحزة،يعني عساس كلام الجيران شلون يشوفونها طالعة برة هالحزة،اهوا ما كان مقتنع و عند روحه ان الموضوع فيه انّ
لأن اهو مقروص من الخيانة اكثر من مرة قبلها فتعقّد عقبها صارت وايد تفاصيل لكن الزبدة ان اهو طاب خاطره و طلعت من قلبه البنت و انتهت السالفة بالطلاق
تعتقدون اللي سواه صح؟
و رفضها اعطاءه الموبايل هل فعلا يثير الشك ؟
انا كل ما اتذكر هذي السالفة اتحسف على قصتهم شلون انتهت على شي تافه جذي
انا عن نفسي لو يصيرلي هالموقف اعطيه الموبايل بدون تردد،
لكن هم اقول ان حتى لو كانت مسوية شي غلط المفروض ان سامحها
انتوا شرايكم؟

احباط

حايشني احباط هالأيام ليش ان وزني نزل و انا من الاصل وزني أقل من الوزن المثالي،عاد نزل ليش اني قبل جم أسبوع استمرضت و ياتني كحة قوية و بنفس الوقت مادري شصار في معدتي،كانت تعورني و كل ما آكل جبدي تقلب فما اقدر اكمل،عاد عبالي يوم يومين و تنتهي السالفة،لا طولت جم يوم،تقريبا اسبوع، و طبعا شنوا النتيجة؟ وزني انخفس،نزلت تقريبا 2 كيلو
عاد الحين قاعدة احاول ارده،و المشكلة و المأزق العود اللي انا فيه اني صايرة مزاجية من ناحية الأكل بشكل لا يطاق و ما اقدر اقزر بأي اكل،ابي الأكل يكون واو

والله اني مرات اكون ميتة من اليوع و اقعد افكر مليون ساعة على ما اوصل حق اكلة اوصي طباخنا يسويها حقي
و طبعا هذا هم بسبب ان طباخنا اكله مو لذيذ فأتحير مادري شقول له يطبخلي
كل أكلاته ما تعجبني
عيزت اطلعله اكلات من النت و اعلمه هم ما كو فايدة

و عيزنا ندور على طباخ درجة اولى مو لاقين،ماني مصدقة ان اكثر من مكتب ابوي موصيهم و ليما الحين محنا لاقين احد
بليز اذا تعرفون مكتب عدل اييب طباخين درجة اولى عطوني اساميهم

وفي شي ثاني ودي أسألكم عنه،الحين غير الغدا،بالأوقات الثانية اللي اهيا ريوق و عشا،شنوا تاكلون؟
عفية لحد يضحك علي
ترى والله أتكلم جد،والله العظيم اني مادري شنوا آكل،
انا احب الجبن لكن لأن اغلب الاجبان مالحة و انا صايرة ما احب الأكل المالح فما قمت احب آكله

قولولي شنوا تحبون تاكلون في الأوقات اللي غير الغدا
يمكن تفيدوني

مؤذن مزعج

صارلي اكثر من مرة اقوم من النوم مفزوعة الفَيِر من صوت الأذان من سبة انه يأذن بطريقة صراااااااااخ فظيع،الظاهر متغير المؤذن او شي مادري،المهم اني اقعد من عز نومي مخترعة من صراخه اقسم بالله قلبي يصير يرقع بطريقة مو طبيعية من الخرعة,يعني ماني فاهمة اكو اسهل من الأذان؟ يعني وايد صعب انه يأذن بطريقة ذربة؟ ياحلو الأذانات اللي يحطونهم بالتلفزيون..
مادري بس انا اعاني من هذي السالفة وللا احد منكم مر في شي جذي؟